फलटण: फलटण येथील वैद्यकीय रुग्णालयातील महिला डॉक्टर आत्महत्या प्रकरणाची सखोल चौकशी करण्यासाठी राज्य शासनाने अखेर निवृत्त न्यायाधीश संजय मेहरे यांच्या अध्यक्षतेखाली चौकशी समितीची स्थापना केली आहे. पोलीस अधीक्षक तुषार दोशी यांनी आज ही माहिती दिली.

​या अत्यंत संवेदनशील प्रकरणातील संशयित आरोपी बडतर्फ पोलीस उपनिरीक्षक गोपाल बाळासाहेब बदने (रा. चांदापूर, ता. परळी, जि. बीड, हल्ली रा. बिरदेवनगर जाधववाडी, ता. फलटण) आणि प्रशांत किसन बनकर (रा. बनकर निवास लक्ष्मीनगर, फलटण) हे दोघेही सध्या न्यायालयीन कोठडीत आहेत.

​चौकशी समितीची मागणी मान्य

​या प्रकरणाची गंभीरता लक्षात घेऊन, मुख्यमंत्री देवेंद्र फडणवीस यांच्या आदेशाने यापूर्वीच राज्य राखीव दलाच्या समादेशक तेजस्विनी सातपुते यांच्या नेतृत्वाखाली एक विशेष तपास पथक (SIT) स्थापन करण्यात आले होते. मात्र, राज्यातील विरोधी पक्ष, विविध सामाजिक संस्था तसेच मृत डॉक्टरच्या नातेवाइकांकडून सातत्याने निवृत्त न्यायाधीशांच्या अध्यक्षतेखाली समिती स्थापन करण्याची मागणी होत होती. त्यानुसार, आज शासनाने या मागणीला प्रतिसाद देत निवृत्त न्यायाधीश संजय मेहरे यांच्या नेतृत्वाखाली चौकशी समिती नेमण्याचा महत्त्वपूर्ण निर्णय घेतला आहे.

​ही समिती आता या प्रकरणाचा सखोल तपास करेल आणि सत्य लवकरच समोर येईल, अशी अपेक्षा व्यक्त करण्यात येत आहे.